Landsliðsþjálfarinn Freyr Alexandersson var vitanlega vonsvikinn eftir 0-1 tapið gegn Dönum í kvöld. Úrslitin þýða að draumur Íslands um að komast á Heimsmeistaramótið að ári er orðinn að engu. Hann hrósaði sínum leikmönnum þó fyrir fínan leik á köflum og vonast til að þær klári undankeppnina með sæmd þrátt fyrir vonbrigðin í kvöld.
„Fyrri hálfleikur var mjög góður. Pressan var frábær og við fengum færin sem við ætluðum að fá. En þú veist hvernig fótboltinn er. Ef þú klárar ekki færin þá geturðu verið bitinn í rassinn og við lentum í því í dag.“
Íslenska liðið var frábært í fyrri hálfleik en það var ekki eins mikill krafur í því í síðari hálfleik. Við spurðum Frey út í muninn á hálfleikjunum.
„Gríðarleg orka og vilji að ná þessu fyrsta marki í fyrri hálfleik, sem við ætluðum okkur að gera. Það skapaði það að við fengum hérna frábær upphlaup, frábær færi og hefðum bara átt að ganga frá þessum leik þar. Í seinni hálfleik vorum við allt í lagi fyrstu mínúturnar en svo þegar þetta mark kemur þá er bara eins og við fáum sjokk og náum okkur ekki upp úr því. Það var eins og við hefðum ekki trú á því. Við náðum ekki að kafa eftir þessari orku sem þarf og svo er náttúrulega möguleiki að við séum bara ekki í nægilega góðu standi til að spila hápressu svona lengi. Ég geri mér alveg grein fyrir því. En, hinsvegar, ef við hefðum skorað þetta mark þá hefðum við getað siglt þessu heim eins og við ætluðum okkur. En svona er þetta bara.“
Íslenska liðiði virtist vel skipulagt til að mæta því danska og Freyr segir lítið hafa komið á óvart hjá gestunum, nema hvað að öflugi sóknarmaðurinn Nadia Nadim var ekki í leikmannahópi þeirra.
„Nadia Nadim var ekki í leikmannahópnum. Hún átti að vera í hópnum. Það er það eina sem kom mér á óvart. Leikskipulagið var það sama og okkar áherslur virkuðu og við áttum bara að ganga frá þessu. Við gerðum það ekki í dag.“
Næstu verkefni liðsins eru heimaleikir gegn Ísrael og Serbíu í september. Freyr býst ekki við að það verði erfitt að gíra íslensku leikmennina upp fyrir þá leiki þó það verði aðeins leikið upp á stoltið.
„Það eru Ísrael og Serbía, 13. og 17. september. Það eru næstu verkefni og við þurfum bara að klára þetta mót með sæmd og fá eins mikið út úr þeim verkefnum og hægt er."
„Það verður ekki erfitt, býst ég við. Við sjáum það þegar að því kemur en þessar stelpur eru bara svo frábærir íþróttamenn og fyrirmyndir að ég trúi engu öðru en að þær muni koma og njóta þess að spila á heimavelli eins og vanalega.“
Að lokum þakkaði Freyr áhorfendum fyrir stuðninginn en það voru 3.595 manns á vellinum í kvöld.
„Ég veit ekki hvað komu margir en mér fannst orka frá stúkunni á köflum og ég var ánægður með það fólk sem mætti. Það hafði áhuga á að mæta og gaf af sér og ég þakka þeim kærlega fyrir stuðninginn.“
Hægt er að horfa á viðtalið við landsliðsþjálfarann í sjónvarpinu hér að ofan.
Athugasemdir