Strákarnir okkar voru mættir á landsliðsæfingu á Kópavogsvelli í kvöld og er undirbúningurinn því formlega hafinn.
Aron Einar Gunnarsson, landsliðsfyrirliði, ræddi við fjölmiðla í dag, en hann er að jafna sig af meiðslum og verður klár í slaginn.
,,Það er smá í ökklanum, en ekkert til þess að hafa áhyggjur af, ekki fyrir leikinn. Það er nógur tími. Ég meiddist aðeins gegn Wolves um þarsíðustu helgi og var ekki með um helgina á móti Fulham, en ég er að verða góður. Ég æfði á föstudag og laugardag og aðeins í dag, ég verð klár fyrir leikinn," sagði Aron Einar.
Leikurinn gegn Tyrkjum leggst vel í Aron og býst hann þó ekki við auðveldu verkefni.
,,Þetta leggst mjög vel í mig. Þetta er mjög sterkt lið sem spilar erfiðan sóknarbolta og sækir á mörgum mönnum. Þeir eru með mikið af fyrirgjöfum, en það ætti að henta okkur. Við erum með sterka varnarmenn sem geta skallað boltann í burtu," sagði Aron.
Athugasemdir