ÍA tók fimmta sætið í Fótbolta.net mótinu eftir að hafa lagt ÍBV að velli eftir vítaspyrnukeppni en leikurinn fór fram í Akraneshöllinni.

Eyjamenn byrjuðu leikinn betur og virkuðu ferskir á upphafsmínútunum en liðið komst yfir með góðu marki þegar Óskar Elías Zoega Óskarsson skoraði. Ásgeir Marteinsson var ferskur í fyrri hálfleiknum hjá ÍA og átti ágætis færi en besta færi ÍA í fyrri hálfleik fékk Garðar Bergmann Gunnlaugsson er hann klúðraði vítaspyrnu undir lok fyrri hálfleiks þegar Guðjón Orri Sigurjónsson varði.

Eyjamenn bættu við öðru marki á 65. mínútu er Gauti Þorvarðarson skoraði áður en Hallur Flosason minnkaði muninn með laglegu marki er hann lék á tvo leikmenn ÍBV áður en hann skoraði. Garðar jafnaði svo metin en meira var ekki skoraði í venjulegum leiktíma.

Leikurinn fór því í vítaspyrnukeppni þar sem ÍA vann 4-1. Árni Snær Ólafsson, Ásgeir Marteinsson, Jón Vilhelm Ákason og Arnar Már Guðjónsson skoruðu allir úr sínum spyrnum.