,,Ég held að yngri strákarnir hafi ekki hafa hugmynd um hver ég var þegar ég mætti til Eyja. Sem betur fer þá erum við ennþá með Yngva Borgþórs og Tryggva og þeir gátu frætt mig um það hver ég var," sagði Jóhannes í útvarpsþættinum en hann hefur skilið norska hreiminn eftir ytra.

,,Ég hef markvisst unnið að því að losna við hreiminn og ég tel að það hafi gengið ágætlega," sagði Jóhannes sem er ánægður með byrjunina í Vestmannaeyjum.

,,Ég var búinn að gera mér ákveðnar hugmyndir um hvernig þetta væri. Ég skoðaði upptökur af leikjum í fyrra eftir að ég tók við og hef verið að kynnast íslenskum fótbolta upp á nýtt. Þetta hefur verið jákvæður tími hingað til hjá ÍBV," sagði Jóhannes sem vill ná stemningu upp í Eyjum.

,,Þegar ég fór að pæla í ÍBV þá á að einkenna liðið ákveðin stemning, gleði og hlaupa og baráttuvilji. Samhliða því eigum við að vera skipulagðir sóknar og varnarlega. Ég vil að liðið geti stjórnað leikjum með boltann og verið beinskeyttir þegar á þarfa ð halda. Strákarnir hafa tekið þessu vel og eru opnir fyrir þessum breytingum sem eru í gangi."

Aðstaðan betri á Íslandi en í Noregi
Jóhannes var áður þjálfari Flekkerøy í norsku 2. deildinni. Hver er munurinn á því og Pepsi-deildinni?

,,Styrkleikinn er eins og 1. deild. Bestu liðin gætu kannski spjarað sig í úrvalsdeild. Aðstaðan þar er ekki jafn góð og hér. Aðstaðan er frábær hér og við búum við einstaka aðstöðu á Íslandi," sagði Jóhannes sem er ánægður með Eimskipshöllina í Eyjum þar sem hægt er að æfa innandyra.

,,Það er magnað að geta æft inni hvenær sem er. Við keyrum aukaæfingar á nánast hverjum degi á morgnanna og síðan erum við með sameiginlega æfingu seinni partinn. Það er fín mæting á aukaæfingarnar."

Breyting er hjá ÍBV í ár þar sem hópurinn er ekki tvískiptur í Vestmannaeyjum og Reykjavík eins og undanfarin ár.

,,Við erum með allan hópinn út í Eyjum nema Aron Bjarnason sem kemur fyrir mót. Við fáum útlendingana vonandi í næstu viku og þá er hópurinn að mestu leyti kominn saman. Það er langt síðan að það gerðist síðast."

Norðmenn öfunda Ísland
Jóhannes hefur verið í viðræum við erlenda leikmenn og hann segir ekki erfitt að fá menn til Íslands.

,,Þeir sem ég hef talað við eru mjög opnir. Umfjöllunin um Ísland hefur verið mikil úti og mikið hefur verið fjallað um árangur landsliðsins. Norðmenn öfunda okkur af því. Það hefur mikið verið í umræðunni hvað þeir geta gert til að bæta sitt landslið og sína deild. Þeir hafa litið mikið til Íslands."

Hér að ofan má hlusta á viðtalið í heild sinni.