Hálftími með þjálfara Breiðabliks
Arnar Grétarsson er kominn aftur í íslenska boltann en hann var ráðinn þjálfari Breiðabliks í október í fyrra.
Arnar Grétarsson var í mjög áhugaverðu hálftíma viðtali í útvarpsþættinum Fótbolti.net á X-inu síðasta laugardag en hægt er að hlusta á viðtalið í heild sinni í spilaranum hér að ofan.
Arnar hefur síðustu ár starfað sem yfirmaður fótboltamála, fyrst hjá AEK Aþenu og svo Club Brugge. Í október í fyrra var tilkynnt um ráðningu hans sem þjálfari Breiðabliks. Arnar útskýrði ákvörðun sína um að koma heim.
Arnar hefur síðustu ár starfað sem yfirmaður fótboltamála, fyrst hjá AEK Aþenu og svo Club Brugge. Í október í fyrra var tilkynnt um ráðningu hans sem þjálfari Breiðabliks. Arnar útskýrði ákvörðun sína um að koma heim.
„Hlutirnir í Belgíu breyttust og félagið ákvað að gera Michel Preud'homme að svona knattspyrnustjóra eins og við þekkjum frá Englandi. Þeir vildu að ég myndi halda áfram að byggja upp tengsl milli félaga og sjá um að finna leikmenn og semja en endanlegt vald yrði í höndum þjálfarans. Þetta breytti miklu og það var margt óljóst. Ég gaf þessu tækifæri en þegar það er erfitt að vakna á morgnana og fara í vinnu sem á að vera skemmtileg þá var ákvörðunin mjög auðveld að lokum," segir Arnar.
„Ég átti þrjú ár eftir af samningnum en þegar maður hefur ekki gaman að því sem maður er að gera þá er betra að hætta. Það hefur alltaf blundað í mér að fara í þjálfun og það var spurningamerki hjá Breiðabliki hvort Gummi (Guðmundur Benediktsson) yrði áfram. Ég vissi að Blikarnir lögðu áherslu á að þjálfarinn yrði í 100% starfi. Það var eitthvað sem var erfitt fyrir Gumma. Mér fannst það spennandi að koma aftur heim."
Arnar segir þjálfarastarfið skemmtilegra að sínu mati en yfirmanns starfið.
„Í þessu ertu náttúrulega í mestum tengslum við leikmennina, þú ert á grasinu. Maður hefur saknað þess. Þetta var mesta tengingin og ég sé ekki eftir því að hafa tekið þetta skref," segir Arnar en í viðtalinu útskýrði hann starf yfirmanns fótboltamála vel og hvernig það gengur fyrir sig.
Erum neðarlega í fæðukeðjunni
Á Íslandi er hann kominn í allt öðruvísi umhverfi en hann hefur starfað í undanfarin ár.
„Við erum á Íslandi og ef við hugsum um fæðukeðjuna þá erum við mjög neðarlega í henni. Þegar lið frá norðurlöndum eða meginlandinu banka á gluggann hjá okkur vilja nánast allir hoppa um leið. Menn vilja komast á hærri „standard" og komast í atvinnumennsku en þrátt fyrir það finnst mér menn vera oft að fara of snemma út og ekki ígrundað hvert menn eru að fara," segir Arnar sem telur að íslensk félög eigi að leggja áherslu á aðra hluti en leikmannakaup.
„Hér heima eigum við frekar að reyna að vera með betri aðbúnað fyrir leikmenn og vera með góða aðstöðu. Gera leikmönnum kleift að æfa við bestu aðstæður og hafa alvöru umgjörð. Þá á að reyna að minnka greiðslur en hafa betri aðbúnað. Á Íslandi verða menn ekki ríkir á því að spila fótbolta og þú vilt fá rétta leiðsögn til að geta tekið næsta skref og þá fer þetta kannski að snúast meira um peninga. Á Íslandi á það ekki að vera þannig. Ég skil það þegar þú ert 28-30 ára en fyrir unga stráka eiga peningar ekki að ráða ferðinni,"
Ungu leikmennirnir komnir lengra
Arnar segist mjög sáttur við leikmannahóp Breiðabliks þó margir stuðningsmenn liðsins hefðu viljað sjá liðið krækja í stærri nöfn. Arnar bendir á að innan herbúða Breiðabliks séu margir spennandi strákar að koma upp.
„Í Kópavoginum er gríðarlega mikið af efnilegum strákum og eitt ár til eða frá getur skipt gríðarlega miklu máli. Ef ég man rétt þá er 95 árgangurinn fyrsti árgangurinn sem varð norðurlandameistari. Nú eru þeir strákar orðnir árinu eldri og eru að detta í tvítugt og eiga að vera meðal bestu manna á Íslandi. Við erum með ansi marga stráka fædda 1995 sem eru mjög efnilegir og eru komnir miklu lengra en þeir voru komnir í fyrra," segir Arnar sem treystir á að þessir strákar stígi skrefið upp.
„Það skiptir miklu máli og maður stólar á það að þessir ungu strákar springi út. Ef þú ert orðinn tvítugur þá er ekkert því til fyrirstöðu að þú getur verið bestur á Íslandi."
„Maður þekkir til þess þegar maður fór til AEK í Grikklandi. Klúbbar sem hafa ekki verið að ná árangri ár eftir ár en það er alltaf krafa á titil, hvað gera þeir? Á hverju einasta tímabili koma um 10 nýir leikmenn og svo aftur 5-6 í janúar. Þetta er ekki áskrift að árangri."
Ekki útihlaup eins og í gamla daga
„Mér finnst mikill metnaður í Kópavoginum og finnst að Kópavogurinn eigi alltaf að vera að berjast um eitthvað. Við förum í hvern einasta leik til að vinna. Ég tel okkur hafa mannskap í það. Í raun á félagið alltaf að vera í topp fjórum, það er mín skoðun," segir Arnar.
Hann segist ekki vera að finna upp hjólið en talsvert hefur verið í umræðunni að hann láti leikmenn sína taka útihlap.
„Það hefur mikið verið talað um það að ég hafi látið menn hlaupa úti. Við erum með ákveðinn tímafjölda í Fífunni og þar er bara fótbolti allan tímann. Allt annað, lyftingar og útihlaup og það, er allt til hliðar. Fótboltinn er alltaf númer eitt, tvö og þrjú. Útihlaupin eru ekki eins og í gamla daga þegar tímaklukkan var sett í gang og sá sem var fyrstur í mark var bestur. Nú er reynt að gera allt með púlsklukkum og byrjað rólega. Þetta mun bara hjálpa strákunum þó þetta sé ekki uppáhalds æfingin þeirra," segir Arnar léttur.
Þegar hann er spurður út í önnur lið Pepsi-deildarinnar segist hann setja pening á að FH verði Íslandsmeistari út frá því sem hann hafi séð.
„Nágrannar okkar í Hafnarfirði hafa verið duglegir að safna og eru að mínu viti með besta mannskapinn. Hvort það dugi til að verða Íslandsmeistari er annað mál. Stjarnan er líka með spennandi hóp og flott þjálfarateymi eins og FH. Svo erum við með lið eins og KR, Víking og Val sem hafa verið að bæta við sig. Svo er Fylkisliðið spennandi og getur á góðum degi verið öllum erfiðir," segir Arnar.
Viðtalið má heyra í heild sinni í spilaranum hér að ofan.
Athugasemdir