Torpedo á harðkjarna hóp af stuðningsmönnum sem koma oft á leiki í þeim tilgangi að vera með læti. Þessi hópur náði að brjótast inn í hlutann þar sem stuðningsmenn andstæðingana voru og logaði allt í slagsmálum.

„Þetta eru alls ekki stilltustu stuðningsmenn í heimi. Menn tóku bara rununa á hina stuðningsmennina meðan leikurinn stóð yfir í fyrri hálfleik. Lögreglan var ekki mjög fljót á vettvang," segir Arnór.

Dómarinn gerði hlé á leiknum og leikmenn fóru inn í búningsklefa í kælingu meðan óeirðalögreglan reyndi að koma málunum í lag. Um 20 manns voru settir í járn.

„Það var rosalegt að sjá þetta. Menn eru margir hverjir algjörir hálfvitar, algjörlega klikkaðir. Við vorum svona 10 mínútur í klefanum og svo róaðist þetta og hægt var að halda leik áfram. Þessir stuðningsmenn eru kolruglaðir og maður hefur kynnst miklum látum síðan maður kom, það hefur verið kynþáttaníð og allskonar."

Arnór segir að leikmönnum hafi þó aldrei fundist sínu öryggi ógnað. Þetta er ekki í fyrsta sinn sem hann upplifir óeirðir.

„Manni fannst við aldrei vera í hættu, ólíkt því þegar óeirðirnar voru í leik Helsingborgar og Djurgår­d­en í fyrra," segir Arnór sem lék þá með Helsingborg. Sá leikur var flautaður af og einn stuðningsmaður lét lífið.

Arnór kom inn sem varamaður í leiknum í gær sem Torpedo Moskva vann 3-1. „Þetta var gríðarlega mikilvægur sigur og gefur okkur smá rými til að anda," segir Arnór en Torpedo er rétt fyrir ofan fallsæti.

Hér að neðan má sjá myndband frá óeirðunum: