Brynjar Þór Gestsson þjálfar Fjarðabyggð.
Það blæs ekki byrlega hjá Fjarðabyggð í upphafi tímabilsins en tæplega helmingur leikmanna liðsins eru komnir á meiðslalista auk þess sem þjálfarinn hefur ekki getað verið með liðinu í undanförnum leikjum.
Fjarðabyggð mætir Fram á Laugardalsvelli klukkan 14:00 á morgun og Brynjar Þór Gestsson þjálfari liðsins á erfitt með að smala í lið fyrir leikinn.
Stefán Eysteinsson, Emils Stefánsson, Hector Pena Bustamante, Jóhann Ragnar Benediktsson, Hákon Þór Sófusson, Ólafur Eyjólfsson, Nik Chamberlain og Andri Þór Magnússon eru allir meiddir.
Þetta eru 8 af 20 leikmönnum í hópi liðsins og því ljóst að aðeins 12 eru leikfærir á morgun. Enginn þeirra glímir við tognun heldur hafa allir meiðst við tæklingar og spörk í leikjum liðsins. Fimm af þessum átta leikmönnum verða frá keppni í fimm vikur.
Brynjar Þór hefur af persónulegum ástæðum misst af síðustu tveimur gegn KA og Leikni F í bikarnum og hefur ekki aðstoðarþjálfara. Því hefur Mark Duffield sem á son í liðinu hlaupið í skarðið en Brynjar Þór ætti að vera klár í slaginn gegn Fram á morgun.
Athugasemdir
