Lestu um leikinn: HK 1 -  3 Fjarðabyggð

Fjarðabyggð hefði getað leikið síðasta heimaleik sinn á Eskjuvelli en Austanmenn kusu að leika innandyra til að vera betur gíraðir fyrir leikinn gegn HK. „Við sáum ekki ástæðu til þess að fara af undirlaginu sem við erum að spila á, í það að spila á grasi sem við erum ekki einu sinni búnir að stíga inn á, í það síðan að fara á þetta undirlag hérna þrem dögum síðar og fara svo á gras aftur. Ég er mjög sáttur og við vissum alveg hvað við vorum að gera, þó svo að það hafi ekki fallið í kramið hjá öllum Austfirðingum.“

Brynjar var ósáttur með dómgæsluna í kvöld og er á því að Sigurður Óli Þorleifsson eigi að vera betri dómari eftir svona langan dómaraferil. Einna helst er hann ósáttur við meðferð sem Brynjar Jónasson, framherji Fjarðabyggðar, fær hjá dómurum landsins. „Það liggur við að menn séu komnir með hendurnar í rassvasann til að spjalda Brynjar. Menn þurfa að taka sig á þarna. Ég get ekki séð hvar menn finna þessar ástæður, því þetta er klárlega brot,“ og vísar Brynjar í þegar nafni hans féll í teig HK og fékk gult spjald fyrir leikaraskap en Brynjar vildi fá víti.

Fjarðabyggð getur farið upp í 2. sæti deildarinnar með sigri á laugardaginn. „Það er rosalega gaman að eiga kost á því að geta spilað upp á þessa hluti. Við tökum bara einn leik í einu. Hvað sem verður erum við að spila vel í augnablikinu.Við mætum bara kokhraustir í þennan leik.“