Hinn 18 ára Albert hefur vakið mikla athygli í Hollandi fyrir framgöngu sína með unglingaliðum Heerenveen og er ljóst að forráðamenn PSV binda miklar vonir við hann í framtíðinni.

Þrátt fyrir ungan aldur er Albert í U21 árs landsliði Íslands en líklegt þykir að hann muni spila með varaliði PSV í hollensku 1. deildinni í vetur.

Eplið féll ekki langt frá eikinni í tilfelli Alberts en foreldrar hans voru bæði mjög liðtæk í knattspyrnu. Faðir hans er Guðmundur Benediktsson og móðir hans er Kristbjörg Ingadóttir. Afi Alberts er Ingi Björn Albertsson og langafi hans og alnafni, Albert Guðmundsson, er einn besti knattspyrnumaður sem þessi þjóð hefur alið af sér.