Einar Friðrik Brynjarsson, tæknifræðingur hjá Lauftækni ehf., telur að gervigrasvæðing á aðalvelli á Íslandi sé óþörf. Gervigrasumræðan hefur verið mikil undanfarin ár en Einar vill að félög horfi frekar til þess að endurnýja grasvelli sína.
Einar var einn aðalhönnuður nýs knattspyrnuvallar Keflavíkur.
Einar var einn aðalhönnuður nýs knattspyrnuvallar Keflavíkur.
„Í þessari umræðu er oft verið að bera saman nýja gervigrasvelli og 40 ára grasvelli, það er óvæginn samanburður. Flestir vellirnir í efstu deild eru gamlir grasvellir og viðhaldið oft ekki í toppmálum," sagði Einar í viðtali við útvarpsþáttinn Fótbolti.net á X-inu.
„Það þarf að lyfta þessari umræðu upp á hærra plan. Við þurfum að skoða þessi mál aðeins nánar. Við erum dugleg að líta til Noregs í þessum efnum, þar hefur verið mikil gervigrasvæðing. Hverju hefur þetta skilað Norðmönnum?"
Formaður leikmannasamtakana í Noregi fullyrti í viðtali að hann teldi að gervigrasvæðing landsins ætti þátt í versnandi gegni landsliðsins.
„Ég man þá tíð þegar Norðmenn voru góðir í fótbolta. Er þetta rétt stefna sem þeir eru á? Ég held að Norðmenn átti sig von bráðar á því að þetta sé ekki rétt leið. Ole Gunnar Solskjær var í viðtali um daginn og sagði að Norðmenn ættu að taka Ísland til fyrirmyndar í fótboltamálum. Það er svolítið skrítið þá að við séum að líta til þeirra."
Viðtalið má heyra í heild sinni í spilaranum hér að ofan.
Athugasemdir