„Það er frábært að spila gegn svona góðu liði eins og Hollandi og vera í þessari stöðu," sagði Jóhann Berg Guðmundsson, leikmaður Íslands, fyrir æfingu í Hollandi í dag.
„Hollenska liðið er mjög sterkt, frábærir leikmenn og frábært lið. Við sýndum það í fyrri leiknum að við getum strítt þeim og vonandi getum við gert það aftur á fimmtudaginn."
Jóhann Berg var frammi gegn Tékklandi en gæti verið á kantinum á fimmtudag, sérstaklega í ljósi þess að Emil Hallfreðsson er meiddur. Sjálfur segist Jóhann ekki vita hvar hann muni spila.
„Ég hef ekki hugmynd um það. Þetta er eitthvað sem þjálfararnir verða að taka ákvörðun um en við sjáum til á fimmtudaginn. Þetta kemur allt í ljós, ég myndi spila í hafsent ef á þyrfti að halda en ég tel ólíklegt að þeir hendi mér þangað," sagði Jóhann léttur.
Eins og við sýndum lesendum í gær fór Jóhann í bátsferð um sýki Amsterdam með Gylfa og Alfreð í gær.
„Gylfi er hérna í fyrsta skipti og ég og Alfreð ákváðum að sýna honum hvernig Amsterdam virkar. Við leigðum fínan bát og rúlluðum aðeins um. Fiskikónginum (Gylfa) líður vel á bátnum," sagði Jóhann í rigningunni í Amsterdam en viðtalið má sjá í heild sinni í sjónvarpinu hér að ofan og þar er meðal annars rætt um möguleika Charlton.
Athugasemdir