Varnarmaðurinn ungi Hjörtur Hermannsson var á föstudag valinn í A-landsliðshópinn sem leikur vináttuleiki gegn Póllandi og Slóvakíu á næstu dögum. Hjörtur hefur leikið mjög vel með U21-landsliðinu en hann er samningsbundinn PSV Eindhoven og leikur með varaliði félagsins í hollensku B-deildinni.
„Ég er til taks ef aðalliðið kallar en það hefur ekki verið eins mikið af því og ég hefði viljað á þessu tímabili," sagði Hjörtur í viðtali í útvarpsþættinum Fótbolti.net á X-inu um helgina.
Heimir Hallgrímsson landsliðsþjálfari sagði að hjá PSV væri litið á Hjört sem framtíðarmann og vonar Hjörtur að landsliðskallið hjálpi sér að komast upp í aðalliðið.
„Þetta skemmir allavega ekki fyrir. Það er ljóst. Ég er bara spenntur að sjá hvernig þetta þróast."
Hjörtur segir að það komi til greina að fara eitthvað á lán frá PSV en viðtalið má heyra í heild sinni í spilaranum hér að ofan.
Athugasemdir