Sara Björk Gunnarsdóttir skoraði fyrir Rosengård í 3-1 sigri gegn Verona frá Ítalíu í Meistaradeild kvenna í síðustu viku. Liðin mætast aftur í Svíþjóð á fimmtudag og komast sigurvegararnir í 8-liða úrslit keppninnar.
„Það voru miklir yfirburðir í þessum leik og mjög sterkt að vinna svona á útivelli," sagði Sara Björk í útvarpsþættinum Fótbolti.net á X-inu FM 97,7 í gær. Hún var spurð út í umgjörðina kringum Meistaradeild kvenna.
„Það er ekki hægt að bera þetta saman við karlakeppnina í dag. Umgjörðin verður svo stærri í 8-liða úrslitum og leikjunum eftir það."
Brasilíski leikmaðurinn Marta spilar með Söru hjá Rosengård en hún er goðsögn í kvennaboltanum.
„Hún hefur verið fimm sinnum valin besti leikmaður í heimi. Það eru forréttindi að fá að æfa og spila með svona leikmanni. Hún er flottur íþróttamaður og er enn með þetta. Ég læri mikið af henni," segir Sara.
Sara varð Svíþjóðarmeistari með liði sínu fyrir um mánuði síðan og var það einnig rætt í viðtalinu sem má heyra í spilaranum hér að ofan.
Athugasemdir