Alfreð Finnbogason skoraði eina mark Íslands í svekkjandi 3-1 tapi gegn Slóvakíu í vináttuleik í kvöld.
Þessi öflugi framherji Olympiakos kom Íslandi yfir snemma leiks en heimamenn skoruðu síðan þrjú mörk í seinni hálfleik og tryggðu sér sigurinn.
Þessi öflugi framherji Olympiakos kom Íslandi yfir snemma leiks en heimamenn skoruðu síðan þrjú mörk í seinni hálfleik og tryggðu sér sigurinn.
„Ég trúi því ekki að við höfum ekki unnið þennan leik. Við vorum með tögl og hagldir á þessu í fyrri hálfleik og þeir skapa ekki neitt sem ég man eftir. Fyrstu 15 í seinni hálfleik eru mjög sterkar hjá okkur. Ég var dæmdur rangstæður, sem ég er ekki viss um að hafi verið rangstaða, Jói gaf á Kolla sem átti bara að vera mark," sagði Alfreð við Fótbolta.net í kvöld.
„Í rauninni eru þetta bara einhverjar 10 mínútur hjá okkur sem eru slakar í leiknum og þeir skora tvö mörk. Það er mjög erfitt að sætta sig við þetta. Öll mörk koma út af mistökum, ég veit ekki alveg hvað gerist þarna, við missum hann bara og ég get eiginlega ekki svarað fyrir það."
Alfreð fagnar því að hafa nýtt sínar mínútur vel, en hann skoraði í Póllandi auk þess að skora í kvöld.
„Klárlega. Ég vil nýta allar mínútur sem ég fæ til að sanna mig, sérstaklega þar sem ég spilaði ekki rosalega mikið í undankeppninni og var ósáttur með það. Þá er þetta eina leiðin til að svara, sýna inni á vellinum hvað ég get gert, og ég hef fulla trú á því að ég geti hjálpað þessu liði með því að vera byrjunarliðsmaður," sagði Alfreð.
„Maður tekur alltaf það jákvæða út úr leikjunum og þetta var gott mark. Snúa og setja hann í fjær, ég var mjög ánægður með það. Ég er bara ósáttur með að hafa ekki skorað fleiri."
Athugasemdir