„Það er ekkert launungarmál að við, og einhver fimm sex lið væntanlega í viðbót, erum í þessu til að koma okkur upp í úrvalsdeild," sagði Sævar Pétursson, framkvæmdastjóri knattspyrnudeildar KA, í útvarpsþættinum Fótbolti.net á X-inu á laugardag. Akureyrarliðið ætlar að gera aðra atlögu að því að reyna að komast upp úr 1. deildinni í sumar.
„Ég tel að 1. deildin sé að verða sterkari með hverju árinu og með mörgum liðum sem eru ekki langt á eftir þeim liðum sem eru í neðri helmingi úrvalsdeildarinnar. Þetta er spurning um 1-2 leikmenn til eða frá."
Miklu var til kostað í lið KA síðasta sumar og liðinu spáð upp. Gengið var undir væntingum en félagið leggur ekki árar í bát og hefur fengið til sín öfluga leikmenn, síðast Almarr Ormarsson.
„Auðvitað voru menn sárir og svekktir að komast ekki upp í fyrra. Núverandi stjórn knattspyrnudeildar tók við haustið 2014 eftir miður skemmtilegt tímabil sem gekk ekki vel. Þá fóru menn að hugsa þetta og markmið okkar er að á næstu árum verði KA stabíll klúbbur í úrvalsdeild. Menn eru búnir að fá nóg af því að vera alltaf í 1. deildinni og nú þurfum við bara að koma okkur upp."
Kassamerkið #pepsi16 var mikið í umræðunni í fyrra.
„Við þorðum að koma fram með það sem allir eru að stefna á. Allt tal um að menn ætli ekki að reyna að komast upp er bara aumingjaskapur. Öll lið í 1. deild vilja ná í þessi tvö sæti sem gefa sæti í úrvalsdeildinni. Það er svo gríðarlegur munur á þessum tveimur deildum hvað varðar umgjörð og allt," sagði Sævar sem segir að KA sé ekki að fara of geyst hvað fjárhaginn varðar.
„Við rekum KA eins og fyrirtæki og semjum ekki við neinn leikmann nema við eigum fyrir honum. Við höfum fjármagnað árið 2016. Við teljum stigin næsta haust en ég hef engar áhyggjur af peningahliðinni á þessu."
Viðtalið má heyra í heild í sinni í spilaranum hér að ofan en þar tjáir Sævar sig nánar um hópinn hjá KA.
Sjá einnig:
Smelltu hér til að hlusta á útvarpsþáttinn í beinni
Komnir til KA:
Almarr Ormarsson frá KR
Ásgeir Sigurgeirsson frá Stabæk (Á láni)
Hallgrímur Mar Bergmann frá Víkingi R.
Farnir frá KA:
Ben Everson
Jóhann Helgason hættur
Ævar Ingi Jóhannesson í Stjörnuna
Athugasemdir