Lestu um leikinn: Stjarnan 4 -  2 KR

„Heldur betur. Bæði náttúrulega að spila einum færri í 70 mínútur og svo á móti hörku KR-liði í dag. Þetta var virkilega erfiður leikur.”

„Við ætluðum að byrja af krafti. Við vissum að þær myndu örugglega liggja örlítið til baka og við vildum reyna að setja tóninn frá byrjun. Mér fannst við gera það. Við nýttum ekki alveg mómentið sem var með okkur. Við hefðum átt að setja mark úr einhverju af þessum færum sem við fáum. Við reyndum það og það var náttúrulega smá sjokk að fá rautt spjald eftir 20 mínútur.”

Adda segist ekki hafa séð hvað átti sér stað þegar Önu Cate var vísað af velli.

„Ég sá það ekki. Ég sneri baki í þetta en hann hlýtur að hafa rétt fyrir sér. Ef að hann er svona ákveðinn í þessu þá hlýtur hann bara að hafa rétt fyrir sér.”

Vildi hann þá meina að hún hefði slegið hana?

„Já, slegið hana eða gefið henni olnbogaskot í magann. Eitthvað svoleiðis.”

Manni færri þurftu Stjörnukonur að hafa fyrir hlutunum og þá sérstaklega þær Adda og Lára Kristín sem léku tvær á miðjunni það sem eftir lifði leiks.

„Já, þetta voru örugglega nokkrir kílómetrar sem við hlupum en virkilega duglegir kantmenn sem við náðum að færa inn og þetta var held ég liðssigur þegar upp er staðið.”

Stjarnan tapaði fyrir Breiðablik í síðustu umferð og Adda er ánægð með að liðið sé komið á beinu brautina aftur.

„Virkilega sátt að klára þennan leik. Erfitt að koma til baka eftir leikinn í seinustu viku þar sem að við ætluðum okkur þrjú stig en mér fannst þetta liðssigur og sýnir hvað við erum með gott lið.”