Sandra María í leik með Þór/KA
Eins og greint var frá fyrr í kvöld þá hefur KA ákveðið að slíta samstarfinu við Þór og tefla fram sínu eigin liði frá og með haustinu 2017.
Í viðtali við mbl.is þá segir Sandra María Jessen, landsliðskona og leikmaður Þór/KA að hún sé fyrst og fremst ótrúlega sár með þessa ákvörðun KA.
Sjálf er Sandra skráð í Þór en hún þjálfar hjá KA. Hún segir hins vegar líklega að nú muni hún hætta því.
„Núna eftir að þetta gerðist langar mig ekki lengur að þjálfa fyrir KA. Það er ekki vegna þess að uppbyggingin sé ekki góð eða umgjörðin léleg, heldur vegna þess að þetta særði mig rosalega mikið. Eins og staðan er núna þá er líklegra en ekki að ég muni hætta þjálfun," sagði Sandra við mbl.is.
Þá segir Sandra að þetta gæti haft mikil áhrif á framtíð kvennaknattspyrnunnar á Akureyri og jafnvel hvetja stelpur til þess að fara suður og er Sandra einnig ósátt með hversu litlar upplýsingar hafa verið veittar af hálfu félaganna.
„Að við þurfum að lesa um þetta á netinu og vita jafnvel minna um þetta mál en aðrir. Ég sem og flestar í liðinu erum bara í hálfgerðu sjokki. Það hefur ekki ein manneskja komið og rætt við okkur. Það vantar upplýsingaflæði til okkar sem málið snertir mest. Þetta hefur mikil áhrif á okkur og ég á eiginlega ekki orð til þess að lýsa því nema bara að þetta er skelfilegt," sagði Sandra að lokum við mbl.is.
Athugasemdir
