„Við töldum okkur í fyrra vera að fara inn í tímabilið með sterkara lið en árið á undan. Menn sem hafa verið að skora mikið af mörkum voru ekki að virka. Framlínan var flott en eitthvað gerist og menn gátu ekki skorað. Við vorum að skapa okkur færi og spiluðum vel gegn sterkustu liðunum en ef þú skorar ekki þá telur það ekki," segir Arnar.

Blikar voru í Evrópubaráttu en gáfu eftir á lokasprettinum og höfnuðu í sjötta sæti.

„Við fengum bara eitt stig úr síðustu þremur leikjum og það er bara okkar aulaskapur. Við höfum verið núna að sækja okkur menn fram á við og ég er mjög ánægður með þá sem hafa komið. Þetta eru ólíkir en flottir leikmenn. Fram á við eigum við að vera sterkir."

Elfar á að spila erlendis
Varnarlega hafa einnig orðið breytingar. Arnór Sveinn Aðalsteinsson sem mikið var á bekknum í fyrra fór í KR, Alfons Sampsted fór í atvinnumennsku í Svíþjóð og þá er miðvörðurinn Elfar Freyr Helgason á láni hjá Horsens í Danmörku.

Horsens er með forkaupsrétt á Elfari í sumar og Arnar getur ekki reiknað með honum í sumar.

„Það er pottþétt að hann spilar ekki fyrr en í fyrsta lagi 15. júlí, hann er ekki laus fyrr því þá er glugginn lokaður. Hann gæti þá komið til baka en maður óskar öllum þessum drengjum velfarnaðar í þessum bolta. Elli er toppdrengur og hefur það mikla hæfileika að hann á að vera úti. Þá óskar maður þess að hann standi sig og komi ekkert heim á næstu árum. Ef hann kemur heim er honum fagnað vel en ef ekki þá óskum við honum góðs gengis úti," segir Arnar.

Viktor Örn Margeirsson, sem var þriðji hafsent Blika, er hugsaður sem byrjunarliðsmaður í dag við hlið Damir Muminovic.

„Við vorum með þrjá topphafsenta í fyrra sem eru svipaðir að gæðum. Þegar Viktor kom inn þá sást ekki munur á varnarleiknum. Þeir eru ólíkir en mjög fljótir og góðir á boltann. Ég er sallarólegur. Maður þarf að hugsa út í hvort ungu strákarnir séu nægilega góðir ef eitthvað kemur upp á, ef Damir eða Viktor lenda í meiðslum. Við erum með unga og virkilega flotta stráka sem eru mjög efnilegir en eru kannski ekki alveg tilbúnir, það getur samt margt breyst á fimm mánuðum. Við sjáum hvað gerist þegar nær dregur sumri."

Viðtalið við Arnar má heyra í heild sinni í spilaranum hér að ofan en þar ræðir Arnar meðal annars um 2-4 tap gegn FH á föstudag, möguleika íslenskra þjálfara á störfum erlendis og stefnu varðandi uppalda leikmenn.