Markvörðurinn Kasper Schmeichel leit á björtu hliðarnar þegar hann ræddi við fjölmiðla eftir 2-1 tap Leicester í fyrri leiknum gegn Sevilla í 16-liða úrslitum Meistaradeildarinnar í gær.
Sevilla var mun betra liðið í leiknum og komst í 2-0 áður en Jamie Vardy minnkaði muninn.
„Það er risastórt að ná útivallarmarki. Það var það sem við vonuðumst eftir því allt getur gerst á King Power vellinum. Það er mikil gleði sem fylgir því að taka þátt í svona leikjum og allir lögðu allt sitt í þetta," segir Schmeichel.
„Það er svekkjandi að hafa tapað en við vorum að leika gegn rosalega öflugu liði og 2-1 á útivelli eru ekki slæm urslit í Meistaradeildinni. Við erum ekki að fagna en við tökum þessum úrslitum."
Liðin mætast aftur í seinni leiknum þann 14. mars í Leicester.
Athugasemdir