Það er alltaf stuð í þýska boltanum og þessi helgi er ekkert frábrugðin. Það fer fram heil umferð og fáum við að sjá tvo leiki í beinni útsendingu.

Það er komið að umferð númer 22, en hún hefst í kvöld kl. 19:30 með leik Wolfsburg og Werder Bremen. Bæði lið hafa verið í veseni, en Aron Jóhannsson og félagar í Bremen eru í 16. sætinu með aðeins 19 stig. Leikurinn er í beinni útsendingu á Stöð 2 Sport 4.

Á morgun eru sex leikir á dagskrá og þar ber hæst leikur toppliðs Bayern og Hamburger. RB Leipzig, sem veitir Bayern mesta samkeppni, á heimaleik gegn Köln og þá heimsækir Borussia Dortmund lið Freiburg.

Það eru svo tveir leikir á sunnudaginn. Ingolfstadt fær Borussia Mönchengladbach í heimsókn kl. 14:30 og þegar þeim leik er lokið mætast Schalke 04 og Hoffenheim.