„Þetta var góður sigur og við spiluðum virkilega vel í fyrri hálfleik. Við höfðum tök á leiknum í fyrri hálfleik en þú getur aldrei verið rólegur þegar Fjölnir er annars vegar. Þetta eru sprækir og sterkir strákar," sagði Willum Þór Þórsson þjálfari KR eftir 3-1 sigur á Fjölni í Lengjubikarnum í kvöld en staðan í hálfleik var 3-0 fyrir KR.
„Það sýndi sig í seinni hálfleik, þeir komu af gríðarlegum krafti í seinni hálfleikinn og við vorum svolítið sofandi og fengum á okkur mark. En ég er ánægður með að við höfum staðið það af okkur og komið okkur inn í leikinn. Þetta var hark í seinni hálfleik frekar en fyrri."
Willum fór sömu leið og mörg önnur lið hafa gert í vetur og spilaði með þriggja miðvarða vörn eins og besta lið Englands, Chelsea, hefur gert með góðum árangri í vetur.
„Það eru nokkur lið að fikra sig áfram með þetta, sem er bara eðlilegt. Ein leiðin til að svara því er að geta spilað það sjálfur. Mér fannst það koma vel út, menn eru að læra þetta," sagði Willum.
„Það þarf að vinna þetta hægt og rólega inn. Við höfum verið að taka þetta einn og einn hálfleik hingað til og spiluðum heilan leik í dag. Þetta er að koma hægt og rólega. 1997 var ég með Þrótt í 1. deild og við unnum deildina með sama leikkerfi. Þetta fer í hringi, núna eru félög að spila þetta með sama árangri, við sáum þetta í Heimsmeistarakeppninni þar sem menn voru að úrfæra þetta vel. Svo sjáum við Chelsea gera þetta virkilega vel og þá fara menn að stúdera þetta."
Willum er að leita að framherja í lið KR fyrir komandi tímabil, ég spurði að lokum út í þá leit.
„Við erum að leita að framherja því það eru þrír framherjar farnir frá því síðasta sumar. Við erum búnir að fá Garðar Jóhannsson, Robert Johan Sandnes og Arnór Svein Aðalsteinsson en það var meira hugsað til að þétta línurnar. Við þurfum allavega einn hreinan framherja fyrir þessa þrjá, Denis Fazlagic, Morten Beck Andersen og Jeppe Hansen. Við erum að leita á fullu, höfum fengið ábendingar hingað og þangað en ekki ennþá hitt á réttan mann."
Athugasemdir