„Við erum í 17 gráðum í dag, sól, rigning og ský til skiptis," sagði Glódís Perla Viggósdóttir, varnarmaður íslenska kvennalandsliðsins í fótbolta, í útvarpsþættinum Fótbolti.net á X-inu 97,7 í dag. „Við búumst samt við sól næstu þrjá daga," bætti Glódís við, en hún er þessa stundina stödd á Algarve-mótinu í Portúgal með íslenska landsliðinu.
Ísland er búið að spila tvo leiki á mótinu hingað til, en niðurstaðan úr þeim leikjum var 1-1 jafntefli gegn Noregi, þar sem Gunnhildur Yrsa Jónsdóttir skoraði mark Íslands, og svo 2-0 tap gegn Japönum í gær. Ísland spilaði 3-4-3 í leiknum í gær.
„Við lendum í því fyrstu 20 mínúturnar að við erum ekki að ná tökum á varnarleiknum í nýja kerfinu okkar, en svo náum við að laga það og þá gengur okkur miklu betur," sagði Glódís um leikinn í gær.
Sara Björk Gunnarsdóttir spilaði í gær sinn 100. landsleik fyrir Íslands hönd. Hún hefur komist á lista yfir bestu miðjumenn í heimi, en Glódís segir að Sara sé fyrirmynd fyrir sig og hinar stelpurnar í hópnum.
„Sara er náttúrulega algjör fyrirmynd og algjör leiðtogi, bæði innan sem utan vallar. Hún hvetur okkur áfram, alltaf! Hún er þessi fyrirmynd, manni langar að vera eins og hún," segir Glódís um Söru.
„Hún æfir eins og geðsjúklingur og það hvetur okkur allar hinar að gera það sama. Það er ómetanlegt að vera með svona leikmann í liðinu sínu, sem er tilbúinn að gera allt fyrir liðið."
Hægt er að hlusta á viðtalið í heild sinni í spilaranum hér að ofan.
Athugasemdir