Fjórir leikir fóru fram seint í gærkvöldi í undankeppni HM í Suður-Ameríku. Argentína fékk Suður-Ameríkumeistara Chile í heimsókn og tryggði Lionel Messi Argentínumönnum mikilvægan sigur með marki úr vítaspyrnu.

Venesúela og Perú gerðu 2-2 jafntefli og þá sigraði Paragvæ 2-1 á heimavelli gegn Ekvador.

Brasilía heimsótti Úrúgvæ í toppslag og voru það heimamenn sem byrjuðu betur. Edinson Cavani kom Úrúgvæ yfir með marki úr vítaspyrnu strax á 8. mínútu en tíu mínútum síðar jafnaði Paulinho, fyrrum leikmaður Tottenham.

Í upphafi síðari hálfleiks var Paulinho aftur á ferðinni óg stundafjórðungi fyrir leikslok skoraði Neymar þriðja mark Brasilíumanna. Paulinho fullkomnaði svo þrennuna sína með marki undir lok leiksins.

Brasilía er nú með örugga forystu á toppi riðilsins og fátt virðist geta stöðvað þá á leið sinni til Rússlands. Fjögur efstu liðin komast beint á HM og þá fer liðið í 5. sæti í umspil um sæti á HM. Mikil spenna er á toppnum en aðeins þrjú stig skilja liðin í 2. sæti og 6. sæti að en í 6. sætinu sitja Suður-Ameríkumeistarar Chile.