„Það er einna helst hægt að skella skuldinni á innkaupastjórann Txiki Begiristain fyrir að hafa ekki haft rænu á að kaupa bakvörð síðan Kolarov var keyptur. Þarna liggur einna helst vandinn í dag. Allir bakverðir liðsins eru yfir þrítugt."

„Varnarskipulag í liðinu er ekki til og það þarf mikið að gera í bakvarðastöðunum og svo kannski fá einn miðjumann líka, einhvern sem er ekki meiddur nánast allt tímabilið og er ekki yfir þrítugu."

Það má búast við miklum breytingum hjá Manchester City í sumar.

„Mér finnst ansi líklegt að það verði stjarnfræðilega há summa sem er að fara út. Það eru fjölmargir að verða samningslausir."

Varnarmaðurinn John Stones er oft mikið í umræðunni en ljóst er að Pep Guardiola hefur tröllatrú á Englendingnum.

„John Stones var ekki góður fram í svona október-nóvember, síðan hefur hann verið eini góði varnarmaður liðsins. Hann gerir enn mistök því varnarskipulagið er þannig. Menn eru hvattir til að taka áhættu með sendingum sem eru misgáfulegar. Ég hugsa að það komi með þroska hjá Stones, hann verði betri í því með árunum," segir Þórgnýr.

„Ég held að það hafi komið Guardiola á óvart hversu jöfn enska deildin er. Augljóslega eru betri lið á toppnum á Spáni en verstu liðin í ensku úrvalsdeildinni geta unnið hvaða lið sem er, nema kannski Sunderland. Deildin er með flesta erfiða leiki."

Hver er búinn að vera besti leikmaður City á tímabilinu?

„Síðan um áramótin er það klárlega Leroy Sane, hann er minn maður. Hann leggur upp eða skorar í næstum hverjum einasta leik. Hann er alltaf spennandi. David Silva hefur verið einn vanmetnasti leikmaður deildarinnar síðan hann kom. Hann hefur haldið því áfram á þessu tímabili, hann er stórkostlegur."

Þórgnýr hefur engar áhyggjur af því að City gæti misst af Meistaradeildarsæti.

„Liverpool á bara eftir leiki gegn verri liðum, leiki sem þeir klára ekki. United á í erfiðleikum með að vinna leiki. Arsenal gæti náð fjórða sætinu en City tekur þá þriðja," segir Þórgnýr.

Ef hann mætti ráða því hver yrði fyrstur á innkaupalista City í sumar leitar hugur hans til Frakklands.

„Ég væri til í að kaupa Mónakó liðið eins og það leggur sig en það yrði frekar dýrt. Fabinho hjá Mónakó yrði minn fyrsti maður á blað. Hann getur bæði spilað sem hægri bakvörður og miðjumaður og það eru stöður sem þarf að laga," segir Þórgnýr en spjallið má heyra í heild sinni í spilaranum hér að ofan.

Sjá einnig:
Hlustaðu gegnum Podcast forrit