banner
   mán 17. apríl 2017 11:30
Magnús Már Einarsson
Með 70 þúsund fylgjendur á Instagram - Spilar á Íslandi í sumar
Thaisa í leik á Ólympíuleikunum í fyrra.
Thaisa í leik á Ólympíuleikunum í fyrra.
Mynd: Getty Images
Brasilísku leikmennirnir Rilany Aguiar Da Silva og Thaisa Moreno sömdu í vetur við nýliða Grindavíkur í Pepsi-deild kvenna.

Rilany og Thaisa eiga báðar leiki að baki með brasilíska landsliðinu. Í síðustu viku skoraði Thaisa í 6-0 sigri Brasilíu á Bolivíu en í fyrra var hún í liðinu sem endaði í 4. sæti á Ólympíuleikunum í Rio.

Báðir leikmennirnir voru einnig í leikmannahópi sænska félagsins Tyresö þegar það fór í úrslit Meistaradeildarinnar árið 2014. Rilany og Thaisa eru báðar vel þekktar í heimalandi sínu og þá sérstaklega sú síðarnefnda.

Thaisa er með tæplega 70 þúsund fylgjendur á Instagram en hún hefur vakið athygli með landsliði Brasilíu sem er í dag í níunda sæti heimslistans. En hvernig enduðu þessir leikmenn hjá nýliðum Grindvíkinga í vetur?

„Ég spurðist fyrir hjá réttum aðilum hvernig ég gæti náð mér í sterka leikmenn og þá fékk ég nafnið á umboðsmanni sem er með flesta leikmenn Brasilíska landsliðsins á sýnum snærum. Hann var með nokkra leikmenn sem ég skoðaði, að endingu ákvað ég að semja við Thaisu og Rilany þar sem þær höfðu spilað í Svíþjóð og að sjálfsögðu eru þær góðir leikmenn," sagði Róbert Haraldsson, þjálfari Grindavíkur, í viðtali við Fótbolta.net í dag.

Róbert segir að Grindvíkingar stefni á að blanda sér í baráttuna í efri hlutanum í sumar eftir að hafa fengið góðan liðsstyrk í vetur.
Athugasemdir
banner
banner
banner