Búið er að fullhanna knattspyrnuhúsið sem hefur fengið nafnið Skessan en fyrir á svæðinu eru tvö minni knatthús sem kennd eru við risa og dverg.

Ljóst er að Skessan verður mikil bygging en hún mun rísa á SA-horni svæðisins. Grunnflötur byggingarinnar verður samtals 8.456 m² og mun knattspyrnuvöllurinn vera 105 x 68 metrar að flatarmáli. Hátt verður til lofts því gert er ráð fyrir að mænishæðin verði 22,8 metrar.

Gerð byggingarinnar verður svipuð þeim tveimur knatthúsum sem fyrir eru á svæðinu en veggirnir verða staðsteyptir með stálgrind og dúk strekktum yfir.

Bygginganefndarteikningar varðandi Skessuna hafa þegar verið samþykktar í skipulags- og byggingaráði Hafnarfjarðar og því ljóst að bið Hafnfirðinga eftir knattspyrnuhúsi í fullri stærð er brátt á enda.

Sjúkra-, þjálfunar- og hótelbygging
Ráðgert er að hótelbygging sem mun einnig hýsa sjúkra- og þjálfunaraðstöðu muni rísa á austurenda vallarins og þar með loka annarri skammhliðinni.

Samkvæmt áætlunum mun hún verða um 8.500 m² að stærð á nokkrum hæðum en skipulagsferli hennar er komið skemmra á veg en knattspyrnuhússins.

Ljóst er að mörg félög á Íslandi líta öfundaraugum til Kaplakrika en íþróttaaðstaða þar er til mikillar fyrirmyndar.

Þar hafa stórhuga forkálfar uppskorið eins og sáð var til og er uppbygging íþrótta- og annarra mannvirkja á svæðinu hvergi nærri lokið.