Lestu um leikinn: Stjarnan 5 -  0 Haukar

Það hitnaði vel í stuðningsmönnum og aðstandendum Hauka þegar Andri Vigfússon dæmdi þriðja mark Stjörnunnar gilt eftir að Viktor Pétur Finnson, aðstoðardómari, hafði flaggað Guðmundu Brynju rangstæða. Fréttaritari fékk að sjá skjámynd úr myndbandstökuvélinni á vellinum þar sem greinilega sást að Guðmunda var rangstæð. Það verður áhugavert að sjá myndabandið í heild enda var annaðhvort um að ræða frábæra ákvörðun Andra eða glórulausa. Kjartan var engu að síður mjög ósáttur með ákvörðunina.

„Þetta mark númer þrjú var náttúrulega bara rangstaða og mér finnst það slæmt þegar línuvörður veifar rangstöðu og hann átti þá að sjálfsögðu að hlaupa til hans og spjalla aðeins. Það er nú alveg svona það minnsta sem hægt er að gera."


„Ég hefði orðið brjálaður ef þetta hefði verið fyrsta markið sem við fengum á okkur en þetta var þriðja markið og þær töluvert betri en við."


Haukakonur fengu nokkur mjög góð færi í leiknum og Kjartan vildi meina að það væri venjan hjá sínu liði.

„Við fáum alltaf tvö til þrjú dauðafæri en við leyfum markmanninum oft að líta vel út og ég fæ það nú stundum á tilfinninguna að þessi mörk séu á hjólum og eitthvað aðeins að fjúka til því við bara viljum ekki hitta þau."


Útlitið er svart fyrir Hauka sem sitja á botni Pepsi-deildarinnar með eitt stig. Kjartan sagðist stefna að því að styrkja liðið í glugganum.

„Við erum að vinna í því að skoða þau mál og eins og staðan er núna þá veit ég ekki alveg hvernig það gengur. Það er alveg klárt að ég ætla ekki að fá leikmann sem er bara á pari við liðið okkar. Við græðum ekkert á því og þess vegna erum við að reyna að leita í leikmann sem er virkilega góður."


Viðtalið má sjá í heild í spilaranum hér að ofan.