Tottenham fékk Chelsea í heimsókn á sinn nýja heimvöll, Wembley, í öðrum leik dagsins í ensku úrvalsdeildinni.

Chelsea tapaði sínum fyrsta leik í deildinni gegn Burnley um síðustu helgi og þeir ætluðu sér að bæta fyrir það.

Fyrsta mark leiksins kom eftir 24 mínútur, en það gerði Spánverjinn Marcos Alonso beint úr aukaspyrnu. Markið var virkilega flott.

Staðan var 1-0 í hálfleik. Tottenham stjórnaði ferðinni í seinni hálfleiknum og þeim tókst loksins að jafna á 82. mínútu leiksins. Þá skoraði sóknarmaðurinn Michy Batshuayi sjálfsmark. Hann var nýkominn inn á sem varamaður fyrir Chelsea þegar hann skoraði.

Þarna héldu flestir að Tottenham væri að tryggja sér stig úr leiknum, en annað kom á daginn. Marcos Alonson, þetta var dagurinn hans. Hann skoraði sigurmarkið stuttu eftir jöfnunarmark Tottenham.

Lokatölur 2-1 fyrir Chelsea og þeir eru komnir á beinu brautina eftir tap í fyrsta leik. Tottenham vann sinn fyrsta leik á tímabilinu, en þeir tapa sínum fyrsta heimaleik. Stuðningsmenn þeirra hafa áhyggjur af því að Wembley muni skemma tímabilið fyrir liðinu.