Það voru tveir leikir í Pepsi-deild karla í kvöld. Tvö efstu liðin, Valur og Stjarnan, halda í við hvort annað.

Valur, sem er á toppi deildarinnar, ætlaði sér að vinna í kvöld eftir að hafa mistekist það í síðustu tveimur leikjum sínum.

Þeim tókst ætlunarverk sitt með því að leggja Grindavík að velli á gervigrasinu að Hlíðarenda.

Einar Karl Ingvarsson skoraði bæði mörk Vals í leiknum. Bæði mörkin voru lagleg, skot fyrir utan teig.

Valur er áfram á toppi deildarinnar, en í öðru sæti er Stjarnan, sem ætlar ekki að gefa neitt eftir.

Stjarnan átti ekki í miklum vandræðum með Fjölni í Garðabænum í kvöld. Hilmar Árni Halldórsson, Ólafur Karl Finsen, Jóhann Laxdal og Guðjón Baldvinsson skoruðu mörkin fyrir Stjörnuna í leiknum.

Stjarnan er í öðru sæti eins og áður segir, þeir eru fimm stigum á eftir Val þegar sex leikir eru eftir af deildinni.