Real Madrid er nú í sjöunda sæti deildarinnar, strax sjö stigum á eftir Barcelona sem er eina liðið í La Liga með fullt hús eftir fimm leiki.

Zinedine Zidane og lærisveinar voru 60% með boltann í gær og áttu 27 marktilraunir á móti 12 tilraunum Real Betis.

Þá hafði liðið leikið 73 leiki í röð án þess að mistakast að skora þegar kom að leiknum í gær. Þetta var í fyrsta sinn sem liðinu mistekst að skora í La Liga síðan það tapaði fyrir Atletico Madrid í febrúar 2016.

Maður leiksins í gær var Antonio Adan, markvörður Real Betis og fyrrum markvörður unglingaliðs Madrídarliðsins.

„Boltinn vildi bara ekki fara inn. Það hefði breytt öllu hefðum við getað náð að nýta eitt færi. En þegar boltinn vill ekki inn geta svona úrslit átt sér stað. Við verðum að halda ró okkar en það er slæmt að hafa bara náð tveimur stigum af níu á heimaleiki," segir Zidane.

„Ég get ekki kvartað yfir framlagi leikmanna, þeir lögðu sig alla í þetta. Það særir þegar andstæðingurinn skorar svona í lokin. Næst þegar við spilum á heimavelli verðum við að gera allt til að ná sigri og snúa við þessu slæma gengi."

Sergio Ramos, fyrirliði Real, hafði þetta að segja eftir leikinn:

„Vonandi er færanýtingin bara vandamálið. Maður hefur séð svona leik enda með 4-0 eða 4-1 sigri og allir eru glaðir. Við spiluðum betur en Betis en úrslitin eru það sem skipta mála. Ég hefði frekar viljað spila illa og ná þremur stigum," segir Ramos.