Fótbolti.net náði tali af Rakel Hönnudóttur síðdegis í gær og spjallaði við hana um komandi leiki gegn Þýskalandi og Tékklandi í undankeppni Heimsmeistaramótsins.
„Ég veit minna um tékkneska liðið en ég veit að þær eru á mikilli uppleið og eru með frábært lið. Ég hef spilað við Þýskaland nokkrum sinnum. Þær eru mjög góðar. Með mikla sögu og mjög gott lið. Þetta gætu orðið ólíkir leikir,“ sagði Rakel.
Hún hefur spilað nokkra leiki gegn Þýskalandi og við spurðum hana hvort eitthvað einkenndi þær viðureignir.
„Ég hef spilað við þær 4-5 sinnum og man eftir miklum varnarleik og fáum tækifærum hjá okkur fram á við. Við þurfum að nýta þau tækifæri sem við fáum í leiknum,“ svaraði Rakel sem fylgdist vel með Þjóðverjum sem og öðrum liðum á Evrópumótinu í sumar.
„Ég fylgdist með öllum liðum á Evrópumótinu og horfði á flesta leiki. Þar á meðal þennan fræga leik á móti Dönum þar sem þær duttu út þannig að við sjáum að þær eru ekki ósigrandi.“
Síðan keppni í Pepsi-deildinni lauk hefur Rakel haldið sér í formi með því að æfa með 2.flokki karla.
„Ég var svolítið stíf í náranum eftir tímabilið þannig að ég var með hjólaprógram og allskonar svoleiðis fyrst en fór svo að æfa með 2. flokki karla. Það var mjög skemmtilegt. Þeir eru mjög góðir í fótbolta þannig að þetta var mjög gott fyrir okkur.“
Nánar er rætt við Rakel í spilaranum hér að ofan en hún kemur meðal annars inn á dægrastyttingu leikmanna í landsliðsferðum og áhuga heimamanna fyrir leiknum á morgun.
Athugasemdir