Lazio fékk Torino í heimsókn á Ólympíuleikvanginum í Róm og gat jafnað nágrannana í Roma á stigum í 4. sæti með sigri.

Bæði lið fengu fín færi í fyrri hálfleik. Hálfleiknum lauk með rauðu spjaldi Ciro Immobile, sem hefur gert 15 deildarmörk og lagt 6 upp í 15 leikjum.

Immobile fékk rautt spjald fyrir að veitast að Nicolas Burdisso með því að ýta brjóstkassanum og öxlinni harkalega í hann með þeim afleiðingum að varnarmaðurinn féll til jarðar. Dómarinn notaðist við myndbandstækni til að taka ákvörðunina.

Gestirnir náðu að opna vörn heimamanna verandi manni fleiri og komust í tveggja marka forystu áður en Luis Alberto minnkaði muninn.

Það var Simone Edera sem gerði út um leikinn með þriðja og síðasta marki gestanna á 73. mínútu, aðeins þremur mínútum eftir innkomu af bekknum.