Framherjinn Garðar Jóhannsson hefur lagt skóna á hilluna. Þetta staðfesti hann í samtali við Fótbolta.net fyrir stuttu.
„Ég er steinhættur," sagði Garðar þegar Fótbolti.net náði af honum tali í dag. Garðar sat með Ólafi Páli Snorrasyni, þjálfara Fjölnis, og grínaðist fyrst með það að þeir væru í viðræðum, en svo tók hann það fram að hann væri hættur.
„Ég er steinhættur," sagði Garðar þegar Fótbolti.net náði af honum tali í dag. Garðar sat með Ólafi Páli Snorrasyni, þjálfara Fjölnis, og grínaðist fyrst með það að þeir væru í viðræðum, en svo tók hann það fram að hann væri hættur.
Garðar ætlaði að hætta eftir tímabilið í fyrra en eftir að hafa rætt við Willum Þór Þórsson, þáverandi þjálfara KR, ákvað hann að halda áfram og taka tímabilið með KR-ingum.
Garðar, sem er 37 ára, spilaði 14 leiki í deild og bikar í sumar án þess að skora mark.
Hann er uppalinn hjá Stjörnunni en hefur einnig leikið með KR, Fylki og Val hér á landi. Hann fór út í atvinnumennsku, þar sem hann spilaði með Fredrikstad og Strømsgodset í Noregi, sem og Hansa Rostock í Þýskalandi. Hann kom aftur heim árið 2011.
Í nóvember á síðasta ári gekk hann í raðir KFG í 3. deildinni áður en hann fór til KR. Hann útilokar ekki að spila í 3. eða 4. deild næsta sumar.
„Ég gæti spilað í 3. eða 4. deildinni eða leikið mér í bumbubolta. En eitthvað fyrir ofan, ekki séns."
Hann kveðst ánægður með það sem hann hefur afrekað á ferlinum.
„Ég er mjög sáttur og geng sáttur frá borði," sagði Garðar að lokum. Garðar lék átta landsleiki fyrir Ísland og skoraði tvö mörk.
Athugasemdir