Albert Guðmundsson, leikmaður PSV Eindhoven, gæti bæst við hópinn en KSÍ vonast til að hann geti verið með þrátt fyrir að ekki sé um alþjóðlega leikdaga að ræða.

„PSV er ekki búið að svara okkur sem þýðir að þeir eru vonandi að hugsa um það. Það væri gaman að sjá hann og meta í þessu verkefni," sagði Heimir.

Kolbeinn Sigþórsson er í endurhæfingu í Katar og stefnir á endurkomu á fótboltavöllinn í nóvember eftir eins og hálfs árs fjarveru. Heimir vill fá hann með til Indónesíu til að skoða Kolbein en Nantes hefur ekki gefið svör hvað það varðar.

„Okkur langaði að sjá hann á þessum tímapunkti og meta sjálfir hvar hann stendur. Það eru góðar fréttir sem koma af honum en við skiljum ósköp vel að lið sem er búið að bíða eftir honum í langan tíma vilji ekki hleypa honum í landsliðsverkefni. Það er eðlilegt að þeir segi nei en við höfum ekki gefið upp alla von," sagði Heimir.

Heimir tilkynnti í dag að íslenska landsliðið verði á Íslandi í undirbúningi fyrir HM og tveir vináttuleikir fari fram á Laugardalsvelli áður en haldið verður til Rússlands.

„Það var einn af mörgum þáttum sem við ræddum úti í Katar með hópnum. Þeir vildu vera meira á Íslandi en við gerðum síðast og það er jákvætt að það er þeirra skoðun."

Hér að ofan má sjá viðtalið í heild sinni en þar talar Heimir meira um hópinn, tengingu A-landsliðs og U21 árs landsliðs, lið Indónesíu, HM dráttinn, Beint í mark og margt fleira.

Sjá einnig:
Kolbeinn stefnir á að snúa aftur í febrúar - Gæti spilað á HM
Íslenski landsliðshópurinn - Fjórir nýliðar fara til Indónesíu