„Við vorum mjög góðir lengst af í þessum leik. Við reynum að halda boltanum og stjórna tempóinu," sagði Bjössi að leikslokum.

Bjössi var mjög ánægður með frammistöðu Tobias Thomsen sem réði öllu á miðjunni og lagði síðasta mark leiksins upp fyrir Patrick Pedersen.

Haukur Páll Sigurðsson átti að byrja á miðjunni í dag en var tekinn úr byrjunarliðinu vegna smávægilegra meiðsla.

„Hann meiddist aðeins í upphitun en það er ekkert alvarlegt. Við erum að fara út eftir tvo daga og það er stutt í mót, við viljum ekki taka óþarfa áhættur með menn sem eru hálftæpir."

Bjössi segist ekki finna fyrir neinni pressu þrátt fyrir að hafa unnið Íslandsmeistaratitilinn með yfirburðum síðasta sumar.

„Ég held að við séum ekki með fleiri stig heldur en nokkuð annað lið í byrjun og við spilum alltaf bara einn leik í hverri umferð.

„Ég held að hvert lið ætti bara að hugsa um sjálft sig og sjá hverju það skilar. Við ætlum allavega að gera það."