Hörður Björgvin Magnússon er líklegur til að vera í byrjunarliði Íslands í stöðu vinstri bakvarðar í fyrsta leik á HM.
Hörður segist hlakka til að mæta Argentínu. Verði hann í byrjunarliðinu fær hann ansi erfiðan andstæðing á móti sér, Lionel Messi.
„Það er þvílík tilhlökkun fyrir að keppa á móti svona sterku landsliði, það gerist ekki oft. Þetta er stór leikur fyrir þjóðina og auðvitað viljum við að þessi leikur verði skemmtilegur, eins og allir aðrir.
„Þeir koma inn í þetta mót með mikla pressu á sér en við höfum enga pressu. Við höfum engu að tapa og reynum að nýta að þeir eru undir pressu. Við þurfum að refsa þeim, reyna að taka þá úr stöðum."
Hörður segir leikmenn vera vel undirbúna fyrir leikinn eftir góða fundi með Frey Alexanderssyni, Freysa.
„Við erum eiginlega tilbúnir fyrir þetta. Nú er bara að æfa og koma sér í betra stand.
„Fundurinn með Freysa var í gær. Þetta var góður hálftíma fundur hjá honum, enginn sofnaði. Hann er þannig gæi að hann heldur öllum vakandi á svona fundum því hann er skemmtilegur og góður í þessu."
Hörður var samherji Paulo Dybala hjá Juventus og eru þeir enn félagar í dag. Hann segist hlakka til að hitta Dybala, sem verður ekki í byrjunarliðinu því hann spilar í sömu stöðu og Lionel Messi.
„Ég hef ekkert heyrt í honum nýlega. Ég heyrði í honum áður en við drógumst með þeim. Það verður bara gaman að sjá hann og hitta á hann. Hann er ungur, hann er framtíðin. Sumir segja að þetta sé síðasta Heimsmeistaramótið hans Messi, Dybala gerir gott tilkall til að taka þessa stöðu þegar Messi hættir."
Athugasemdir