Rúrik Gíslason.
Rúrik Gíslason hefur gjörsamlega slegið í gegn á Instagram undanfarna daga eftir að hann kom inn á gegn Argentínu. Rúrik er kominn með 622 þúsund fylgjendur á Instagram þegar þetta er skrifað.
„Þetta er fyndið og léttmeti í hópnum. Þetta er skemmtilegt, sérstaklega fyrir hann," sagði Alfreð Finnbogason á fréttamannafundi í dag.
„Þetta byrjaði í klefanum eftir leik þegar hann var kominn í 70 þúsund followers. Skömmu síðar voru það 75 þúsund. Ég veit ekki hvað var að gerast í Suður Ameríku á meðan á leiknum stóð en þetta er gott fyrir hans og hans markaðsvirði."
„Rúrik er loksins að fá þá viðurkenningu sem hann á skilið fyrir þetta ótrúlega look," bætti Hannes Þór Halldórsson við og uppskar hlátur hjá fjölmiðlamönnum.
Rúrik setti enga nýja mynd á Instagram strax eftir leikinn gegn Argentínu.
„Við vorum að stríða honum að það kom ekki mynd í 2-3 daga eftir þessa miklu hylli. Hann er núna með ennþá fleiri fylgjendur sem hann þarf að sinna og þarf að leggja ennþá meiri vinnu í þetta."
„Þetta truflar ekkert undirbúninginn hjá okkur. Þetta er bara skemmtilegt til að dreifa athyglinni á eitthvað annað en fótboltann. Ég get alveg sagt það að honum leiðist þetta ekkert."
Athugasemdir
