Dómstóll í Kólumbíu úrskurðaði í dag um að maðurinn sem myrti kólumbíska landsliðsmanninn Andres Escobar fyrir að skora sjálfsmark á HM 1994 myndi sleppa strax úr fangelsi fyrir ódæðið miklu fyrr en áætlað hafði verið.
Escobar skoraði sjálfsmark í leik Kólumbíu gegn Bandaríkjamönnum á HM 1994 og eftir að hann kom til heimalandsins var hann myrtur 2. júlí 1994 á bílastæði fyrir utan næturklúbb en þetta var nokkrum dögum eftir að hann skoraði sjálfsmarkið sem varð til þess að Bandaríkjamenn unnu leikinn 2-1 og Kólumbíumenn féllu úr keppni.
Maðurinn sem myrti hann, Humberto Munoz, var dæmdur til 43 ára fangelsisvistar á þeim tíma en í gær, ellefu árum síðar samþykkti dómstóll að sleppa honum vegna góðar hegðunar og fyrir að mennta sig vel í fangelsinu. Nöfn dómaranna sem kváðu upp dóminn voru ekki gefin út af öryggisástæðum.
,,Í sannleika sagt er ekkert réttlæti í Kólumbíu," sagði Dario Escobar faðir leikmannsins við útvarpsstöð í landinu í gær.
,,Fyrir mér er réttarkerfið í Kólumbíu blekking. Það hefur blekkt landið, og fjölskyldu okkar með því að segja að hann [Munoz] yrði settur bakvið lás og slá í 43 ár, og nú er morðingin laus."
Þúsundir manna voru viðstaddir útför Escobar og þeirra á meðal var Cesar Gaviria forseti landsins sem sagði leikmanninn hafa verið fórnarlamb fáránlegs ofbeldis sem kæmi ljótu orðspori á landið.
Kólumbískir knattspyrnumenn hafa síðan þá verið undir ógn og undanfarin þrjú ár hafa tveir fyrrum atvinnumenn verið myrtir.
Á myndinni að neðan má sjá fána áhorfendur á leik Hollands og Írlands á HM 4. júlí 1994 settu upp en textann á honum má þýða sem svo: ,,Andreas Escobar. Kólumbía mun aldrei gleyma þér. Stöðvum morð hugleysingja."
Athugasemdir
