Heimild: Skessuhorn
Framtíð Óla Þórðar hjá ÍA ræðst á næstu tveimur dögum. Hér er hann í leiknum gegn Víkingum í gærkvöld.
Eftir fyrri umferð Landsbankadeildar karla situr ÍA á botni deildarinnar með aðeins 6 stig eftir 9 leiki og er sú staða allt önnur en menn vonuðust eftir fyrir mót. Nú virðist sem framtíð Ólafs Þórðarssonar, þjálfara liðsins ráðist á næstu tveimur dögum en þetta kemur á vefsíðu Skessuhornsins.
Eiríkur Guðmundsson, formaður rekstararfélags meistaraflokks ÍA, segir í viðtali við Skessuhornið að stjórn félagsins muni fara yfir stöðu mála á næstu dögum.
"Við munum fara yfir stöðu mála á næstu dögum og meta til hvað ráða hægt er að grípa til þess að snúa þessari þróun við," sagði Eiríkur og bætti við að niðurstaða í þessu máli muni liggja fyrir á næstu tveimur dögum.
Í viðtali við Fréttablaðið sagði Ólafur að hann myndi fara niður með liðinu ef þess þyrfti en Eiríkur segir það útilokað.
"Það er fráleitt að líta á það sem kost í stöðunni og þetta hljóta að vera orð sem féllu í hita leiksins að óathuguðu máli“ sagði Eiríkur um þessi ummæli Ólafs.
