Staðan er sú að leikmennirnir báðir eru samningsbundnir Corinthians í Brasilíu en það félag er rekið af alþjóðlegum fjárfestahópi, Media Sports Investment sem er skammstafað MSI.

MSI gerði umdeildan samning við Corinthians árið 2004 sem gefur fjárfestahópnum stjórn á félaginu í skiptum fyrir stórar fjárfestingar. Samningurinn er til tíu ára og í kjölfarið komu stórstjörnur eins og Carlos Tévez, Marcelo Mattos, Gustavo Nery, Roger, Javier Mascherano og Carlos Alberto til félagsins.

Þessi sami hópur, MSI, reyndi í nóvember 2005 að ná yfirtöku í West Ham United en það gekk ekki eftir þar sem ekki náðist samkomulag um kaupverð.

Lengi hefur verið orðrómur um að Roman Abramovich eigandi Chelsea eigi 15% hlut í MSI en því hefur þráfaldlega verið neitað. Orðrómurinn sem nú gengur á netinu er þess efnis að Abramovich hafi í gegnum MSI ákveðið að lána Tevez og Mascherano til West Ham til að sjá hvernig þeir aðlagast í ensku deildinni og ef vel gengur kaupa þá til Chelsea næsta sumar.

Sums staðar hefur því jafnvel verið fleygt að með þessu hafi Abramovich litið svo á að hann væri að koma í veg fyrir að Arsenal eða Manchester United nái að styrkja sig með því að næla í Tevez eins og flestir miðlar höfðu talið að gengi í gegn í dag.