Borðinn sem Hvatarmenn flögguðu í kvöld.
Stuðningsmenn Hvatar á Blönduósi mættu með nýjan óvenjulegan borða á leik liðsins gegn Tindastóli í þriðju deildinni í kvöld. Leikurinn fór fram á Blönduósi og á borðanum sem heimamenn flögguðu stóð: ,,Eyjólfur Sverris er ykkur að kenna!"
Eyjólfur Sverrisson landsliðsþjálfari Íslands hefur legið undir mikilli gagnrýni í þjóðfélaginu að undanförnu fyrir gengi íslenska landsliðsins í síðustu tveimur leikjum liðsins í undankeppni EM 2008 þar sem Ísland gerði 1-1 jafntefli við Liechtenstein og tapaði stórt, 5-0, fyrir Svíþjóð.
Eyjólfur er frá Sauðárkróki þar sem hann hóf feril sinn með Tindastóli og með borðanum hafa stuðningsmenn Hvatar væntanlega verið að skammast yfir gengi landsliðsins undir stjórn Eyjólfs.
Meðfylgjandi í þessari frétt er mynd af borðanum sem Hvatarmenn flögguðu í kvöld en það voru hinsvegar Tindastólsmenn sem fóru brosandi heim í kvöld enda fengu þeir þrjú stig í hús eftir 0-1 útisigur.
Athugasemdir
