Heimild: BBC
Aukaumferð sem spiluð er erlendis í framtíðinni?
Úr leik í ensku úrvalsdeildinni.
Ensk félög skoða nú þann möguleika að leika einhverja leiki í ensku úrvalsdeildinni utan Englands í framtíðinni en þetta hefur BBC eftir öruggum heimildum.
Á fundi í London í dag samþykktu öll 20 félögin í deildinni að skoða þann möguleika að fjölga leikjunum á tímabilinu úr 38 í 39.
Þessi aukaumferð, tíu leikir, yrðu leiknir á völlum annarsstaðar í heiminum og myndu stórborgir geta sótt um að fá leikina.
Talið er að það yrði dregið hvaða lið myndu mætast í þessari aukaumferð en fimm efstu liðin í deildinni gætu ekki mætt hvort öðru.
Ólíklegt er að nokkur ákvörðun verði tekinn fyrr en á árlegum fundi úrvalsdeildarinnar í júní næstkomandi.
Ljóst er að ef þessi hugmynd gengur í gegn þá munu stórborgir í Asíu, Mið-Austurlöndum og Norður-Ameríku væntanlega sýna mikinn áhuga á að fá þessa leiki til sín en væntanlega fengju fimm stórborgir leikina og yrði þá einn leikur á laugardegi í hverri borg og annar á sunnudegi.
Athugasemdir
