Malen, Maguire, Rashford, Greenwood, Yoro, Eriksen og fleiri góðir í slúðri dagsins
   sun 20. júlí 2008 22:17
Gunnar Gunnarsson
Umfjöllun: Blikar slátruðu vængbrotnum Skagamönnum
Marel Jóhann átti frábæran leik fyrir Blika í kvöld
Marel Jóhann átti frábæran leik fyrir Blika í kvöld
Mynd: Fótbolti.net - Andri Janusson
Guðmundur Kristjánsson átti góðan dag á miðju Blika í kvöld en hér er hann með boltann í leiknum.
Guðmundur Kristjánsson átti góðan dag á miðju Blika í kvöld en hér er hann með boltann í leiknum.
Mynd: Fótbolti.net - Andri Janusson
Mynd: Fótbolti.net - Andri Janusson
Breiðablik 6 - 1 ÍA
1-0 Nenad Zivanovic ('3)
2-0 Jóhann Berg Guðmundsson ('21)
3-0 Nenad Zivanovic ('25)
4-0 Magnús Páll Gunnarsson ('68)
5-0 Magnús Páll Gunnarsson ('73)
6-0 Prince Rajcomar ('77)
6-1 Björn Bergmann ('82)

Blikar hafa verið á fjúgandi siglingu og öðlast gríðarlegt sjálfstraust að undanförnu eftir tvo flotta sigra í röð gegn Fylki og HK. Hinir grænu sýndu áfram allar sínar bestu hliðar þegar Skagamenn komu í heimsókn á Kópavogsvöll í kvöld og fóru með sannfærandi sigur af hólmi með sex mörkum gegn einu.

Það var algjör einstefna á Kópavogsvelli í kvöld þegar Blikar tóku á móti Skagamönnum. Veislan hófst strax á þriðju mínútu og þar voru að verki Nenad bræðurnir í liði heimamanna. Petrovic gaf á Zivanovic sem skoraði með glæsilegu skoti efst í markhornið.

Áfram hélt sóknarþungi heimamanna og næsta mark kom á 21. mínútu. Þar var að verki hinn bráðefnilegi Jóhann Berg eftir laglegan undirbúning frá Marel Baldvinssyni sem er óðfluga að komast í sitt gamla góða form.

Ekki þurftu áhorfendur að bíða lengi eftir næsta marki en þar var aftur að verki Nenad Zivanovic og aftur lagði Marel upp markið fyrir samherja sinn.

Staðan 3-0 í hálfleik og Skagamenn litu vægast sagt skelfilega út gegn Blikum sem léku á alls oddi og með sjálfstraustið í botni.

Skagamenn hófu seinni hálfleikinn af miklum krafti og ætluðu sér ekki að leggja árar í bát en Blikar vörðust þeim vel og blésu svo aftur til sóknar líkt og í fyrri hálfleiknum.

Magnús Páll Gunnarsson kom inná sem varamaður um miðjan seinni hálfleik og það tók hann aðeins sex mínútur að skora tvö mörk eftir glæsilegar sendingar frá Jóhanni Berg og Marel.

Prince Rajcomar skoraði svo sjötta mark Blika á 77. mínútu og áhorfendur Blika sungu hástöfum í stúkunni "Það er gaman að vera Bliki". Björn Bergmann náði þó að laga stöðuna fyrir Skagamenn undir lokin en það breytti litlu, stórsigur Blika í höfn 6-1 og Kópavogspiltar setja stefnuna á toppbaráttu með þessari stórbrotnu frammistöðu.

Allt Blika liðið var að spila vel, Marel að komast í sitt gamla góða form. Bæði Petrovic og Zivanovic spiluðu frábærlega ásamt Jóhanni Berg. Ekki má gleyma varnarþættinum þar sem Srdjan Gasic er að spila fullkomnlega í vörninni og svo er fyrirliðinn Arnar Grétarsson eins og gamalt vín sem verður aðeins betri með árunum. Stórkostlegur sigur Blika 6-1 en útlitið hjá Skagamönnum hefur sjaldan eða aldrei verið jafn dökkt.


Breiðablik: Casper Jacobsen (M), Srdjan Gasic, Nenad Petrovic, Arnar Grétarsson (F), Guðmundur Kristjánsson, Jóhann Berg Guðmundsson, Marel Jóhann Baldvinsson, Kristinn Jónsson, Nenad Zivanovic, Arnór Sveinn Aðalsteinsson, Finnur Orri Margeirsson.

Varamenn: Árni Kristinn Gunnarsson, Prince Rajcomar, Magnús Páll Gunnarsson, Olgeir Sigurgeirsson, Vignir Jóhannesson (M), Steinþór Freyr Þorsteinsson og Guðmann Þórisson.

ÍA: Trausti Sigurbjörnsson (M), Árni Thor Guðmundsson, Guðjón Heiðar Sveinsson, Bjarni Guðjónsson (F), Heimir Einarsson, Helgi Pétur Magnússon, Vjekoslav Svadumovic, Dario Cingel, Jón Vilhelm Ákason, Björn Bergmann Sigurðarson, Aron Ýmir Pétursson.

Varamenn: Árni Snær Ólafsson (M), Hlynur Hauksson, Guðmundur Böðvar Guðjónsson, Atli Guðjónsson, Andri Júlíusson, Árni Ingi Pjetursson og Þórður Guðjónsson.

Aðstæður: Völlurinn í góðu standi en mjög napurt.
Áhorfendur: 1002
Dómari: Jóhannes Valgeirsson
Maður leiksins: Marel Jóhann Baldvinsson (Breiðablik)

Athugasemdir
banner
banner
banner
banner