László Szilágyi í leik með Magna fyrr í sumar.
Magni Grenivík úr annarri deild hefur fengið framherjann Laszlo Siket til liðs við sig.
Ungverskur miðjumaður, László Szilágyi, kom til Magna fyrir tímabilið og hefur leikið mjög vel með liðinu í sumar en nú mun landi hans einnig koma til Magna.
Laszlo Siket, er 23 ára, en hann kemur til landsins á sunnudag og verður því ekki kominn til landsins fyrir leik Magna og Aftureldingar á laugardag.
,,Upphaflega stóð til að hann kæmi fyrr en betra er seint en aldrei. Hann kemur á sunnudaginn og verður klár á miðvikudaginn á móti Hetti," sagði Atli Már Rúnarsson þjálfari Magna við Fótbolta.net en hann hrósar László Szilágyi fyrir frammistöðuna í sumar.
,,Hann er góður og er alltaf að verða betra og betra. Það tók smá tíma fyrir hann aðlagast. Fyrstu 3-4 leikina var hann við það að fara heim en síðan fór þetta að rúlla betur og hann fór að komast betur inn í þetta. Það verður gott fyrir hann að fá annan með sér," sagði Atli Már.
