Dregið var í riðla í undankeppni EM í gær en leikdagar Íslands í keppninni verða ákveðnir áttunda mars næstkomandi.
Þá munu forráðamenn Portúgals, Danmerkur, Noregs, Kýpur og Íslands hittast á fundi í Kaupmannahöfn og raða niður leikjunum.
Undankeppnin hefst í september næstkomandi og Carlos Queiroz, landsliðsþjálfari Portúgal, hefur sagt að hann vilji mæta Íslendingum í fyrsta leik.
KSÍ hefur einnig áhuga á að láta það ganga eftir enda þarf Ísland að leika heimaleiki sína á meðan að veðurfar er hagstætt hér á landi.
,,Við getum ekki spilað heimaleiki í mars en annað er óklárt. Ég myndi samt gjarnan vilja byrja á Portúgal í haust," sagði Þórir Hákonarson framkvæmdastjóri KSÍ við Fótbolta.net í dag.
