Eggert Gunnþór Jónsson lagði upp annað mark Hearts þegar að liðið sigraði Hibernian 2-1 í skosku úrvalsdeildinni í dag.
Eggert Gunnþór skallaði hornspyrnu áfram á Gary Glen sem að kom Hearts í 2-0 á 27.mínútu, þremur mínútum eftir að Andrew Driver skoraði fyrsta markið.
Derek Riordan minnkaði muninn fyrir Hibernian í síðari hálfleik en lokatölur urðu 2-1 fyrir Hearts.
Eggert Gunnþór lék allan leikinn með Hearts í dag en hann fékk sjálfur ágætt færi til að skora.
Hearts er eftir sigurinn í sjötta sæti, sjö stigum á eftir Hibernian en sex stigum á undan St Johnstone sem er í sjöunda sætinu.
