Heimild: Goal.com
Dagblaðið Algemeen Dagblad greindi frá því í morgun að Arnór Smárason, sem mun yfirgefa herbúðir hollenska úrvalsdeildarliðsins Heerenveen í sumar, sé á óskalista FC Groningen sem leikur í sömu deild.
Arnóri var tjáð af forráðamönnum Heerenveen í síðustu viku að samningur hans við félagið yrði ekki endurnýjaður vegna slæmrar fjárhagsstöðu félagsins og hafa mörg lið sýnt honum áhuga í kjölfarið.
Samkvæmt hollenskum fjölmiðlum er þýska 1. deildarliðið Fortuna Dusseldorf eitt þessara liða auk þess sem lið í Englandi, Skandinavíu og Hollandi hafa augastað á leikmanninum.
Hins vegar er ljóst að FC Groningen hefur ekki áhuga á Arnóri og voru forráðamenn félagsins fljótir að kveða niður þær vangaveltur í kjölfar fréttar Algemeen Dagblad í morgun.
,,Ég hef ekki hugmynd um hvaðan þessi frétt kemur. Smárason er ekki á óskalista okkar. Þessi frétt er röng,“ sagði Hans Nijland, framkvæmdarstjóri Groningen, í samtali við Voetbal International.
