Breiðablik tapaði 1-0 gegn Moterwell í Skotlandi í kvöld í fyrri leik liðanna í annarri umferð Evrópudeildarinnar.

Ross Forbes skoraði eina markið á 63.mínútu leiksins. Hann átti þá hornspyrnu sem var skölluð í burtu en Forbes gerði sér þá lítið fyrir og skrúfaði boltann í markhornið.

John Sutton, Jamie Murphy og Ross Forbes fengu allir færi til að bæta við mörkum fyrir heimamenn.

Blikar ógnuðu líka nokkrum sinnum og Kristinn Steindórsson fékk fínt færi auk þess sem Guðmundur Pétursson gerði sig líklegan.

Síðari leikurinn fer fram á Kópavogsvelli í næstu viku og Blikar ættu að eiga ágætis möguleika á að komast áfram.