Brynjar Gauti Guðjónsson, fyrirliði Víkings Ólafsvíkur, var í viðtali í útvarpsþættinum Fótbolti.net á X-inu 97,7 síðastliðinn laugardag. Þar greindi Brynjar meðal annars frá því að leikmenn liðsins skella sér alltaf í sjóinn fyrir leiki.
,,Það er misjafnt hvað menn fara langt en sumir stinga sér alltaf," sagði Brynjar Gauti.
,,Antonio (Maria Ferrao Grave), sjúkraþjálfarinn er mikill sjósundsmaður og hann stakk upp á þessu fyrir Stjörnuleikinn. Það virkaði og við höfum haldið þessu áfram."
Víkingur mætir FH í undanúrslitum VISA-bikarsins klukkan 19:15 í kvöld og mikil spenna er hjá Ólafsvíkingum fyrir þann leik.
,,Ég held að það sé enginn í liðinu sem hefur nokkurn tímann spilað þarna þannig að það verður gaman að fara og mæta alvöru úrvalsdeildarliði á þeirra heimavelli."
,,Við sýndum á móti Stjörnunni að ef allir leggja sig 100% fram og eru tilbúnir í leikinn þá getum við strítt hvaða liði sem er á landinu."
Sjá einnig:
Smelltu hér til að hlusta á útvarpsþáttinn frá því á laugardag
