„Þetta er mjög sætt. Það er virkilega ánægjulegt að klára leiki í uppbótartíma og fyrir mig er alltaf gaman að koma á Stjörnuvöllinn,“ sagði Jóhannes Karl Sigursteinsson við Fótbolta.net eftir 2-1 sigur Breiðabliks á Stjörnunni í Pepsi-deild kvenna í kvöld.
Breiðablik tryggði sér sigur með marki frá Jónu Kristínu Hauksdóttur í uppbótartíma og er þetta ekki í fyrsta skiptið sem Blikar vinna Stjörnuna á slíkan hátt.
„Við höfum verið að gera mikið að þessu undanfarið og þetta er þriðji leikurinn í röð gegn Stjörnunni sem við vinnum í uppbótartíma, þannig að við vissum allan tímann að þetta yrðu níutíu mínútur plús. Þegar að þessi lið mætast er þetta alltaf stál í stál.“
Topplið Vals tapaði sínum leik í dag og eru Blikar einungis þremur stigum frá Íslandsmeisturunum en hafa leikið einum leik meira. Eiga þær enn möguleika á titlinum?
„Við verðum bara að vona og klára okkar prógram, það er númer eitt tvö og þrjú. Við eigum aldrei séns í Val ef við töpum okkar leikjum,“ sagði Jóhannes Karl en viðtalið í heild sinni má sjá hér fyrir ofan.
